കേരളത്തിൻ്റെ വിവിധ ഭാഗങ്ങളിലെ ചരിത്രപ്രാധാന്യമുള്ള ഗ്രന്ഥശാലകളിലെ അപൂർവ ഗ്രന്ഥസമ്പത്തുകൾ ഡിജിറ്റൈസ് ചെയ്ത് വരുംതലമുറയ്ക്കായി സംരക്ഷിക്കുന്ന ഗ്രന്ഥപ്പുരയുടെ പ്രവർത്തനങ്ങളിൽ പുതിയൊരു നാഴികക്കല്ലുകൂടി ചേർക്കപ്പെടുകയാണ്. തിരുവനന്തപുരം ജില്ലയിലെ കല്ലിയൂർ പഞ്ചായത്തിലെ പെരിങ്ങമ്മലയിൽ പ്രവർത്തിക്കുന്ന എസ്.എൻ.വി. വിവേകപ്രദായിനി ഗ്രന്ഥശാല & ഗാന്ധിസ്മാരക ഗ്രന്ഥശാലയുടെ സഹകരണത്തോടെ ഗ്രന്ഥപ്പുരയുടെ ഡിജിറ്റൈസേഷൻ പ്രവർത്തനങ്ങൾക്ക് തുടക്കമായിരിക്കുകയാണ്.
1945-ൽ ശ്രീനാരായണഗുരുവിൻ്റെ സ്മരണാർത്ഥം സ്ഥാപിതമായ ഈ ഗ്രന്ഥശാല ഇന്ന് എൺപത് വർഷങ്ങളുടെ അഭിമാനകരമായ പാരമ്പര്യം പേറുന്ന കേരളത്തിലെ ശ്രദ്ധേയമായ ഗ്രാമീണ ഗ്രന്ഥശാലകളിലൊന്നാണ്. ഒരു വായനശാല എന്ന പരിധിക്കപ്പുറം, വിജ്ഞാനവ്യാപനത്തിനും സാമൂഹിക പരിവർത്തനത്തിനും സാംസ്കാരിക വളർച്ചയ്ക്കും പ്രാദേശിക വികസനത്തിനും നേതൃത്വം നൽകിയ ഒരു ജനകീയ പ്രസ്ഥാനമായാണ് ഈ സ്ഥാപനം വളർന്നത്.
1946-ൽ കേരള ലൈബ്രറി കൗൺസിലുമായി അഫിലിയേറ്റ് ചെയ്ത ഈ ഗ്രന്ഥശാലയുടെ വളർച്ചയ്ക്ക് അടിത്തറയായത് ജനങ്ങളുടെ പുസ്തകസംഭാവനകളും സർക്കാർ ധനസഹായവും പ്രദേശവാസികളുടെ ആത്മാർത്ഥമായ പിന്തുണയുമാണ്. ഇന്ന് സ്വന്തമായ ഇരുനില കെട്ടിടത്തിലും ആധുനിക സൗകര്യങ്ങളോടുകൂടിയ സെമിനാർ ഹാളിലും വിവിധ പ്രവർത്തനവിഭാഗങ്ങളുമായി ഈ ഗ്രാമീണ ഗ്രന്ഥശാലയിലെ പ്രവർത്തനം മുന്നേറുന്നു.
അംഗീകാരങ്ങളുടെ നെറുകയിൽ
പ്രവർത്തനമികവിൻ്റെ അംഗീകാരമായി 2002-ൽ തിരുവനന്തപുരം താലൂക്കിലെ ഏക റഫറൻസ് ലൈബ്രറിയായി ഈ സ്ഥാപനം ഉയർത്തപ്പെട്ടു. ഇന്ന് 'എ പ്ലസ്' ഗ്രേഡ് ഗ്രന്ഥശാല എന്ന അംഗീകാരവും കല്ലിയൂർ ഗ്രാമപഞ്ചായത്തിലെ ഏക ഹരിത ഗ്രന്ഥശാല എന്ന ബഹുമതിയും ഈ സ്ഥാപനം സ്വന്തമാക്കിയിട്ടുണ്ട്.
സാങ്കേതികവിദ്യയുടെ സാദ്ധ്യതകൾ ഏറ്റവും നേരത്തെ തിരിച്ചറിഞ്ഞ ഗ്രന്ഥശാലകളിലൊന്നാണ് എസ്.എൻ.വി. വിവേകപ്രദായിനി ഗ്രന്ഥശാല. കേരളത്തിൽ ആദ്യമായി പുസ്തകങ്ങളുടെ കാറ്റലോഗ് പൊതുജനങ്ങൾക്ക് ഓൺലൈനിലൂടെ ലഭ്യമാക്കിയ ഗ്രന്ഥശാല എന്ന പ്രത്യേകതയും ഈ സ്ഥാപനത്തിനുണ്ട്. ഗ്രാമീണ പശ്ചാത്തലത്തിൽ പ്രവർത്തിക്കുന്ന ഒരു ഗ്രന്ഥശാലയ്ക്ക് സാങ്കേതികവിദ്യയെ എത്ര ഫലപ്രദമായി ഉപയോഗപ്പെടുത്താനാകുമെന്ന് തെളിയിച്ച മാതൃക കൂടിയാണിത്.
കുടുംബശ്രീയുടെ ചരിത്രവുമായി ചേർന്നുനിൽക്കുന്ന ഗ്രന്ഥശാല
ഈ ഗ്രന്ഥശാലയുടെ ചരിത്രത്തിലെ ഏറ്റവും ശ്രദ്ധേയമായ അദ്ധ്യായങ്ങളിലൊന്നാണ് സ്ത്രീശാക്തീകരണ രംഗത്ത് നൽകിയ സംഭാവന. 1990-ൽ തിരുവനന്തപുരം സെൻ്റർ ഫോർ ഡെവലപ്മെൻ്റ് സ്റ്റഡീസുമായി (CDS) സഹകരിച്ച് കല്ലിയൂർ, പള്ളിച്ചൽ, വെങ്ങാനൂർ പഞ്ചായത്തുകളിൽ വനിതാ സ്വയംസഹായ സംഘങ്ങൾ രൂപീകരിച്ച പദ്ധതി വിജയകരമായി നടപ്പിലാക്കുന്നതിൽ ഈ ഗ്രന്ഥശാല നിർണായക പങ്കുവഹിച്ചു. പിന്നീട് കേരളത്തിൽ രൂപംകൊണ്ട കുടുംബശ്രീ പ്രസ്ഥാനത്തിന് മാതൃകയായ ആദ്യകാല വനിതാ സ്വയംസഹായ സംഘം സംരംഭങ്ങളിലൊന്നായി ഈ പദ്ധതി വിലയിരുത്തപ്പെടുന്നു. സ്ത്രീശാക്തീകരണത്തിലും സമൂഹവികസനത്തിലും ഗ്രന്ഥശാലകൾക്ക് വഹിക്കാനാകുന്ന പങ്കിൻ്റെ മികച്ച ഉദാഹരണമാണ് ഈ ചരിത്രം.
സമൂഹത്തോടൊപ്പം സഞ്ചരിക്കുന്ന ഒരു ഗ്രന്ഥശാല
പുസ്തകങ്ങൾ വായിക്കാൻ മാത്രം ആളുകൾ എത്തുന്ന ഇടമല്ല ഈ ഗ്രന്ഥശാല. സമൂഹത്തിൻ്റെ എല്ലാ വിഭാഗങ്ങളെയും ഉൾക്കൊള്ളുന്ന നിരവധി ജനകീയ പദ്ധതികൾ ഇവിടെ വർഷങ്ങളായി നടപ്പിലാക്കിവരുന്നു.
'പടവുകൾ' പദ്ധതി കുട്ടികളിൽ പൊതുവിജ്ഞാനവും മത്സരപരീക്ഷാ തയ്യാറെടുപ്പും ശക്തിപ്പെടുത്തുന്നു. 'പുസ്തകക്കൂടാരം' പദ്ധതി സമീപ പ്രദേശങ്ങളിലെ വിദ്യാലയങ്ങളുമായി ചേർന്ന് കുട്ടികളിൽ വായനാശീലം വളർത്തുകയാണ് ലക്ഷ്യമിടുന്നത്. കുട്ടികൾ, സ്ത്രീകൾ, വയോജനങ്ങൾ എന്നിവർക്കായി പ്രത്യേക കൂട്ടായ്മകളും പ്രവർത്തനവേദികളും രൂപീകരിച്ച് വിവിധ സാമൂഹിക-സാംസ്കാരിക പരിപാടികൾ സംഘടിപ്പിച്ചുവരുന്നു.
ആരോഗ്യബോധവൽക്കരണം, യുവജനശാക്തീകരണം, വിദ്യാഭ്യാസ പ്രവർത്തനങ്ങൾ, വിദൂരവിദ്യാഭ്യാസം നടത്തുന്നവർക്ക് റഫറൻസ് സൗകര്യങ്ങൾ എന്നിവ ഉൾപ്പെടെ വൈവിദ്ധ്യമാർന്ന സേവനങ്ങളിലൂടെ ഈ ഗ്രന്ഥശാല ഇന്നും പ്രദേശത്തിൻ്റെ സാമൂഹിക ജീവിതത്തിൽ സജീവ സാന്നിധ്യമായി തുടരുകയാണ്.
ഗ്രന്ഥപ്പുരയോടൊപ്പം ഒരു പുതിയ സംരക്ഷണയാത്ര
ഈ ഗ്രന്ഥശാലയിൽ പതിറ്റാണ്ടുകളായി സൂക്ഷിച്ചുവന്ന അമൂല്യമായ പുസ്തകശേഖരം ഡിജിറ്റൈസ് ചെയ്ത് ഭാവിതലമുറയ്ക്ക് സംരക്ഷിക്കാനുള്ള ശ്രമത്തിൻ്റെ ഭാഗമായി ഇപ്പോൾ ഗ്രന്ഥപ്പുരയും എസ്.എൻ.വി. വിവേകപ്രദായിനി ഗ്രന്ഥശാലയും ഒരുമിക്കുകയാണ്. അപൂർവ ഗ്രന്ഥങ്ങൾ കാലപ്പഴക്കത്തിൻ്റെയും ഉപയോഗത്തിൻ്റെയും ഫലമായി നശിച്ചുപോകാതെ ഡിജിറ്റൽ രൂപത്തിൽ സംരക്ഷിക്കപ്പെടുന്നത് കേരളത്തിൻ്റെ വിജ്ഞാനപൈതൃകം സംരക്ഷിക്കുന്നതിൽ നിർണായകമായ ഒരു ചുവടുവയ്പ്പാണ്.
ഈ ഡിജിറ്റൈസേഷൻ പ്രവർത്തനത്തിനായി ഗ്രന്ഥശാലയുടെ അമൂല്യമായ ശേഖരങ്ങൾ ലഭ്യമാക്കുകയും എല്ലാ സഹകരണവും വാഗ്ദാനം നൽകുകയും ചെയ്ത ഗ്രന്ഥശാല പ്രസിഡൻ്റ് എസ്.എസ്. സുജീവ്, സെക്രട്ടറി ഡി. കൃഷ്ണമൂർത്തി, ജോയിൻ്റ് സെക്രട്ടറി സജി എസ്. നായർ എന്നിവർക്കും ഗ്രന്ഥശാലയുടെ മുഴുവൻ പ്രവർത്തകർക്കും ഗ്രന്ഥപ്പുരയുടെ ഹൃദയം നിറഞ്ഞ നന്ദി രേഖപ്പെടുത്തുന്നു.